Su libru de su Paba in contu de sa poesia
In custas dies passadas est essidu su libru Bivat sa poesia! una faina contivigiada dae para Antonio Spadaro e publicada dae Ares. Est una regorta de iscritos de paba Frantziscu in contu de s’importu de sa poesia e de sa literadura, in sa formatzione e in s’educatzione, ma fintzas in sa relata de sa Crèsia cun sa cultura de su tempus nostru.
Mai dannu tengat sa poesia, duncas! E, in unu billete chi at mandadu a su curadore para Spadaro, Frantziscu espressat s’ispera chi sa poesia si potzat imparare in is Universidades pontifìtzias de totu su mundu, pro ite ca èducat su coro e sa mente, nos agiudat a s’ascurtare pare-pare, nùdriat su cherbeddu e s’imaginàriu nostru, faghet cùrrere sa fantasia.
Paba Bergoglio est un’amantiosu de sa literadura a manera generale e de sa poesia, pro ite ca leghent su coro de s’òmine, agiudant a nde fàghere essire a campu su disìgiu, is cosas bellas e cussas malas, su lughentore e sa misèria. E no est una teoria. Su libru est una regorta de iscritos bogados dae entzìclicas, pregadorias apostòlicas, parlatas e messàgios, prefatziones, intervistas, lìteras in ue su Paba faeddat de s’importu de s’iscritura poètica.
Comente a sa Lìtera in contu de su rolu de sa literadura in sa formatzione o sa Lìtera a is poetas, ambas duas de su 2024, in ue Frantziscu domandat a is poetas de nos agiudare a bisare. In sa formatzione sua ant lassadu unu rastru fungudu poetas comente a Borges e Marechal, Dostoevskij, Manzoni e Dante.
E chi a Frantziscu dd’aggradet sa poesia si cumprendet leghende cale si siat iscritu suo, prenu de riferimentos poèticos semper pretzisos. Ma in su libru nde essit a pìgiu chi Bergoglio, cando a metade de is annos Sessanta fiat professore in su Litzeu de Santa Fe, in Argentina, teniat unu ghetu didàticu criadore chi ddu portaiat a invitare a is dischentes a iscrìere contos e poesias e a fàghere nàschere in s’iscola sua una cambarada rock de pitzocheddos e pitzocheddas ispirada a sa mùsica de is Beatles.
Ca sa poesia, narat paba Frantziscu, nos agiudat a totus a èssere prus umanos, e oe nde tenimus bisòngiu mannu!
Faina fatta cun s’agiudu de sa Regione Sardigna Avisu IMPRENTAS – L.R. 22/2018, art. 22
A cura di Antoni Nàtziu Garau
