Su Pòburu de Assisi
Sa Làudi a Deus
Santu Frantziscu fiat avesu a fai no sceti sa Carèsima innantis de sa festa de Pasca Manna, ma ndi faiat prus de una: innantis de sa Pasca de su Spìridu Santu, de santu Miali, de sa festa de santu Martinu e àteras. Una chi faiat sèmpiri fiat cussa po santu Miali in su monti de La Verna.
Duus annus innantis de si morri (comenti giai eus cumentzau a contai in s’ùrtimu nùmeru) nd’iat fatu una in su cabudanni de su 1224 in onori de s’Arcàngelu Capitanu, e Deus dd’iat bisitau cun d-una bisioni: sa Gruxi Santa ddi fiat cumparèssia, ammantada de alas de àngelus e de is manus, de su costau e de is peis de Gesùs fiant arribaus a is manus, a su costau e a is peis de su santu lampus de luxi chi dd’iant segau sa carri, comenti a cussa de Gesùs etotu.
Ddi fiant bessidas is stìmatas e ddi fiant abarradas finas a morri. Po issu cussas feridas fiant comenti a sa boxi de Deus, chi ddu stimàt e chi ddi naràt chi totu su chi iat fatu in vida fiat un’arrespusta a sa volontadi sua. Est po custu motivu chi su Santu scriit cussa Làudi manna cun 31 Tui, chi fait cumprendi sa stima chi issu teniat po Deus e cussa chi sciiat chi Deus teniat po issu.
Su Tui no fiat sa manera de totus de tzerriai a Deus po arrespetu, po reverèntzia. Santu Frantziscu ponit in filera 31 Tui innui bantat a Deus po is fainas e de gràtzia e de làstima e ddi torrat gràtzias po totu su chi at arriciu in vida. No est su Testamentu, chi at a scriri apustis, ma dd’assimbillat meda. In custa Làudi s’arrennescit a biri s’ànimu de su santu, sa fortza sua, sa bellesa de su spìridu chi at pesau in agiumai binti annus (da sa cunversioni a sa morti) cun cussa penitèntzia, cun s’oratzioni e cun s’ascurtu de su Fueddu de Deus.
In prus, custa Làudi nascit de s’atentu chi teniat po sa liturgia e po sa missa. Giai eus biu chi is primus fueddus nascint, forsis, de is fueddus latinus de su Santu, innantis de sa cunsacratzioni. E cussa oratzioni dda scriit e dda donat a para Lioni, chi fiat su cumpàngiu suu candu si cuàt in calincunu padenti po pregai o po abetai su Fueddu de Deus.
Difatis, in cussu scritu agatau in su Cunventu de Assisi ddoi est una scrita Leo e intras is vocalis e e o ddoi est pintada una gruxi a forma de sa lìtera T, comenti s’ùrtima lìtera de s’alfabetu ebràicu, imperada de su profeta Ezechieli comenti a sinnu in cara po is chi Deus iat sarvau. In prus iat pintau una cara brabuda chi sulàt asusu de unu monti.
MAC sighit…